Sulat para kay Nanay at Tatay
Sulat ni INDIO (lapb)
Nay, Tay sa inyong pagtanda, kahit kalian, ay di ko kayo pwedeng pabayaan, kasama na dun ang pahabain ko ang aking pasensya.
Pag natatapon ninyo ang sabaw, ‘di kaya nakabasag kayo ng pinggan, di ako galit kahit na nasigawan ko kayo, nagulat lang ako at ayaw ko kayong masugatan kaya ko naman nagawa yon.
Minsan deretso sigaw na ang sagot ko sa inyo, dahil pagod na din po ako sa pag-ulit ng mga sinasabi ko, aminado naman po kayo na mahina na ang pandinig niyo kaya sana naman huwag sumama ang loob niyo dahil wala naman personalan ang pagtaas ng boses ko.
Kahit kelan ay di ko kayo pinamadali sa paglalakad kung hindi nga lamang at mabilis ang sasakyan pagtatawid tayo sa lansangan, sino ba naman ang may gusto na kayo ay masagasaan? Kasama niyo ako magpatingin sa doctor, at alam natin pareho na binawal kayong maglakad ng mabilis dahil sa sakit ninyo sa puso, alam ko na yun, hindi na po kayo kailangan humingi ng pasensya.
Sa kakulitan niyo, minsan ako po ay nabuburyong, kaya huwag po kayong magalit kung bigla akong umalis na lang o makatulog, pagod na po kasi ako sa trabaho, at tao lang po ako na marunong mapagod at naghahanap ng pahinga.
Kahit mabaho kayo ay hindi ako na-iinis, ngunit sabi ng doctor dapat kayo ay malinis para laging mabuti at magaan ang inyong pakiramdam, nakakaragdag sa bigat ng katawan ang dumi na hindi po niyo gustong hugasan, lagi ko naman po kayo pinapakulo ng tubig, para maligamgam ang tubig na gamit sa paliguan.
Sana naman po ay huwag kayong magtampo kung minsan ay maungit na ako at di napagbibigyan ang inyong kapritso. Napapagod din naman po kasi ako sa trabaho, at sa kaka-isip sa inyo.
Huwag po kayong magtampo pag hindi na ako makatulong sa mga gawaing bahay, at ang reklamo ninyong ako ay tulog ng tulog, ito lang po ang paraan ko ng pag pahinga sa utak kong hapo na sa kakaisip kung paano pagkakasyahin ang kita sa trabaho, paano maghanap ng side-line pambili ng maintenance niyo. Minsan lagin nang nakakunot ang noo ko, dahil araw na naman ng check up niyo at malamang mangutang na naman ako. Hindi ko na sinasabi ito sa inyo dahil ayaw ko ng mag-isip pa kayo. Tama na lang na ako na lang, at sa akin na lang masama ang loob niyo.
Sana naman po, sa pagtityaga ko sa pag-aalaga sa inyo, eh tigilan na ninyo ang panunumbat sa akin, alam ko naman po ang utang na loob ko sa inyo. Kaya nga po magkanda kuba na ako sa pagkita ng pera at kahit di na ako nakapag asawa eh andito pa rin ako sa tabi ninyo. Sana po huwag na tayong magsumbatan, dahil ako pinagpapasa-Diyos ko na lang ang lahat ng ito. Siya ang nanamili na ako ang maging anak niyo at kayo ang maging magulang ko, kaya sa lahat lahat Siya ang pasimuno, malay niyo, ma-una pa ako sa inyo sa paglisan sa mundo.
Kung mangyari ito, hindi ko pa rin kayo iiwan. Babantayan ko kayo kung hanggang saan ako papayagan.
Nagmamahal,
Ang inyong anak.
